shahr-e-dil aisa ki hairan thi tilismat ki gard

shahr-e-dil aisā ki hairāñ thī tilismāt kī gard

jam ga.ī jis ke dar-o-bām pe ḳhadshāt kī gard

ek hī naam faqat mujh ko dikhā.ī diyā hai

saaf kartā rahā ik 'umr maiñ safhāt kī gard

maiñ ne kuchh shahroñ meñ yuuñ ḳhaak uḌī dekhī hai

jaan le kuchh bhī nahīñ tere mazāfāt kī gard

ab koī gard bhī ho mujh ko zarā farq nahīñ

aañkh meñ jab se paḌī tere ishārāt kī gard

tere ā'māl ki jis tarh riyā-kārī kī dhuul

tere afkār ki ho jaise tazādāt kī gard

gaañv meñ amn se rahte haiñ vafā karte haiñ

shukr hai ham pe nahīñ paḌtī mahallāt kī gard

ab mujhe tū hī batā kaise tujhe dekhtā maiñ

chaar sū uḌtī rahī tere ḳhayālāt kī gard

shahr-e-dil aisa ki hairan thi tilismat ki gard

jam gai jis ke dar-o-baam pe KHadshat ki gard

ek hi nam faqat mujh ko dikhai diya hai

saf karta raha ek 'umr main safhat ki gard

main ne kuchh shahron mein yun KHak uDi dekhi hai

jaan le kuchh bhi nahin tere mazafat ki gard

ab koi gard bhi ho mujh ko zara farq nahin

aankh mein jab se paDi tere ishaaraat ki gard

tere aa'mal ki jis tarh riya-kari ki dhul

tere afkar ki ho jaise tazadat ki gard

ganw mein amn se rahte hain wafa karte hain

shukr hai hum pe nahin paDti mahallat ki gard

ab mujhe tu hi bata kaise tujhe dekhta main

chaar su uDti rahi tere KHayalat ki gard