شہر دل جمال کا کس نے یہ حال کر دیا

شہر دل جمال کا کس نے یہ حال کر دیا

آنکھوں میں تیرگی بھری ہنسنا محال کر دیا

تم سے ہمارا درد کا رشتہ ہی جب نہیں رہا

کیسے کہیں کہ درد نے کیسا نڈھال کر دیا

لب پہ شکایتیں نہ تھیں جی میں بہت ملال تھا

اس پہ تمہارے ذکر نے آنکھوں کو لال کر دیا

پوروں پہ آسمان کو رکھنا بہت محال تھا

میں نے جنون شوق میں یہ بھی کمال کر دیا

اس کا کہا تو سچ نہ تھا میرا سنا بھی سچ نہ تھا

لیکن فصیل وقت نے منظر اجال کر دیا

وہ درد جو تھا آشنا اس کو کہاں سے لائیں اب

اس کے بغیر زیست نے جینا وبال کر دیا

مشکل بہت تھا پوچھنا کیسے مجھے بھلا دیا

جب تیرے روبرو ہوئی فوراً سوال کر دیا