shahr-e-dushman ki badalta hai faza ek hi shaKHs

shahr-e-dushman kī badaltā hai fazā ek hī shaḳhs

ab bhī kartā hai mire haq meñ du'ā ek hī shaḳhs

sāhabo maiñ ne tarāshe nahīñ patthar ke sanam

mere hāthoñ se banā aur banā ek hī shaḳhs

shāh-zādī tujhe mā'lūm nahīñ hai shāyad

khol saktā hai tire band-e-qabā ek hī shaḳhs

merā likkhā to mirī jaañ nahīñ miTne vaalā

maiñ ne kāġhaz pe likhā aur likhā ek hī shaḳhs

chāhtā thā ki khulūñ aur khulūñ aisā khulūñ

mere khulne pe khulā aur khulā ek hī shaḳhs

tujhe mā'lūm nahīñ hai to nahīñ hai phir bhī

tere 'anjum' se milā aur milā ek hī shaḳhs

shahr-e-dushman ki badalta hai faza ek hi shaKHs

ab bhi karta hai mere haq mein du'a ek hi shaKHs

sahabo main ne tarashe nahin patthar ke sanam

mere hathon se bana aur bana ek hi shaKHs

shah-zadi tujhe ma'lum nahin hai shayad

khol sakta hai tere band-e-qaba ek hi shaKHs

mera likkha to meri jaan nahin miTne wala

main ne kaghaz pe likha aur likha ek hi shaKHs

chahta tha ki khulun aur khulun aisa khulun

mere khulne pe khula aur khula ek hi shaKHs

tujhe ma'lum nahin hai to nahin hai phir bhi

tere 'anjum' se mila aur mila ek hi shaKHs