shahr-e-ehsas mein zaKHmon ke KHaridar bahut

shahr-e-ehsās meñ zaḳhmoñ ke ḳharīdār bahut

haath meñ sañg uThā shīshoñ ke bāzār bahut

koī khiḌkī hai salāmat na koī darvāza

mere ghar ke sabhī kamre haiñ havā-dār bahut

haath thakte nahīñ rañgoñ ke hayūle ban kar

ahl-e-fan ko sar-e-kāġhaz ḳhat-e-pur-kār bahut

dasht meñ bhī vahī āsār haiñ ābādī ke

phailtā jaatā hai ab sāya-e-dīvār bahut

dhuup kā phuul girā shāḳh-e-shafaq se jis dam

din kā chehra nazar aatā thā shikan-dār bahut

naqsh hai zehn pe yuuñ terā tilismī paikar

maiñ huuñ ḳhud apnī nigāhoñ meñ pur-asrār bahut

lafz kirnoñ kī tarah dil meñ utar jaate haiñ

dil nashīñ hai tirā pairāya-e-iz.hār bahut

ḳhauf dushman kī tarah mere ta.āqub meñ bhī thā

ḳhanjar-e-vahm ke maiñ ne bhī sahe vaar bahut

tan ga.e itne mire gird havāoñ ke pahāḌ

saañs lenā bhī hai mere liye dushvār bahut

ab bhī lamhoñ se salāsil kī khanak aatī hai

ab bhī haiñ vaqt ke zindāñ meñ giraftār bahut

zaḳhm ke chāñd na rātoñ ko mire dil meñ utaar

mere siine pe na rakh sañg-e-girāñ-bār bahut

tīrgī aa.e na 'siddīq' ziyā ke nazdīk

kaaT rakhtī hai ye TuuTī huī talvār bahut

shahr-e-ehsas mein zaKHmon ke KHaridar bahut

hath mein sang uTha shishon ke bazar bahut

koi khiDki hai salamat na koi darwaza

mere ghar ke sabhi kamre hain hawa-dar bahut

hath thakte nahin rangon ke hayule ban kar

ahl-e-fan ko sar-e-kaghaz KHat-e-pur-kar bahut

dasht mein bhi wahi aasar hain aabaadi ke

phailta jata hai ab saya-e-diwar bahut

dhup ka phul gira shaKH-e-shafaq se jis dam

din ka chehra nazar aata tha shikan-dar bahut

naqsh hai zehn pe yun tera tilismi paikar

main hun KHud apni nigahon mein pur-asrar bahut

lafz kirnon ki tarah dil mein utar jate hain

dil nashin hai tera pairaya-e-izhaar bahut

KHauf dushman ki tarah mere taaqub mein bhi tha

KHanjar-e-wahm ke main ne bhi sahe war bahut

tan gae itne mere gird hawaon ke pahaD

sans lena bhi hai mere liye dushwar bahut

ab bhi lamhon se salasil ki khanak aati hai

ab bhi hain waqt ke zindan mein giraftar bahut

zaKHm ke chand na raaton ko mere dil mein utar

mere sine pe na rakh sang-e-giran-bar bahut

tirgi aae na 'siddiq' ziya ke nazdik

kaT rakhti hai ye TuTi hui talwar bahut