shahr-e-ghazal mein bikne ko tayyar kaun hai

shahr-e-ġhazal meñ bikne ko tayyār kaun hai

yūsuf nahīñ to zīnat-e-bāzār kaun hai

sab ke laboñ pe na.ara-e-mansūr hai magar

ye dekhnā hai aaj sar-e-dār kaun hai

apnā zamīr jhuuT kabhī boltā nahīñ

tum hī kaho ki sāhab-e-kirdār kaun hai

tark-e-ta.alluqāt ko ik umr ho ga.ī

tanhā.iyoñ meñ mā.il-e-guftār kaun hai

tasvīreñ roz bantī haiñ sheroñ kī shakl meñ

mere tasavvurāt kā shahkār kaun hai

jalne ko sham.a bhī jalī parvāna bhī jalā

kaise kaheñ ki kis kā vafādār kaun hai

ham log ḳhānqāhoñ meñ jā.eñge kis tarah

sab pārsā haiñ ham sā gunahgār kaun hai

ashkoñ ke phuul le ke maiñ niklā to huuñ 'ra.īs'

ye dekhnā hai un kā ḳharīdār kaun hai

shahr-e-ghazal mein bikne ko tayyar kaun hai

yusuf nahin to zinat-e-bazar kaun hai

sab ke labon pe nara-e-mansur hai magar

ye dekhna hai aaj sar-e-dar kaun hai

apna zamir jhuT kabhi bolta nahin

tum hi kaho ki sahab-e-kirdar kaun hai

tark-e-talluqat ko ek umr ho gai

tanhaiyon mein mail-e-guftar kaun hai

taswiren roz banti hain sheron ki shakl mein

mere tasawwuraat ka shahkar kaun hai

jalne ko shama bhi jali parwana bhi jala

kaise kahen ki kis ka wafadar kaun hai

hum log KHanqahon mein jaenge kis tarah

sab parsa hain hum sa gunahgar kaun hai

ashkon ke phul le ke main nikla to hun 'rais'

ye dekhna hai un ka KHaridar kaun hai