shahr-e-jaan par jo teri yaad ka lashkar TuTa

shahr-e-jāñ par jo tirī yaad kā lashkar TuuTā

ek hamle meñ hisār-e-dil-e-ḳhud-sar TuuTā

jaise ik barq sī lahrā.ī pas-e-parda-e-abr

jaise ik chāñd sar-e-shāḳh-e-sanobar TuuTā

aa gayā tā ba girebān-e-shafaq dast-e-sahāb

bām-e-aflāk pe nāhīd kā mehvar TuuTā

mere sāġhar meñ utar aaya kisī shaam kā aks

merī āñkhoñ meñ kisī husn kā nashtar TuuTā

dil kī gahrā.ī meñ phir jaag uThā sho.ala-e-dard

munjamid thā jo mire ġham kā samundar TuuTā

dasht-e-ayyām se lauTī kisī ehsās kī guuñj

ma.abad-e-jāñ meñ kisī vahm kā paikar TuuTā

phir pur-asrār yakā yak huī ḳhāmoshī-e-shab

phir koī jaam kisī haath se gir kar TuuTā

kāsnī dhuup ke aañsū mirī āñkhoñ se bahe

jaise ik mahr-e-daraḳhshāñ mire andar TuuTā

ġhul machāte hue rangoñ ke parinde nikle

sang-e-hairat se jab ā.īna-e-manzar TuuTā

gumbad-e-gosh meñ gūñjī phir ik āvāz-e-shikast

kyā ḳhabar ye mirā dil TuuTā ki sāġhar TuuTā

shahr-e-jaan par jo teri yaad ka lashkar TuTa

ek hamle mein hisar-e-dil-e-KHud-sar TuTa

jaise ek barq si lahrai pas-e-parda-e-abr

jaise ek chand sar-e-shaKH-e-sanobar TuTa

aa gaya ta ba gireban-e-shafaq dast-e-sahab

baam-e-aflak pe nahid ka mehwar TuTa

mere saghar mein utar aaya kisi sham ka aks

meri aankhon mein kisi husn ka nashtar TuTa

dil ki gahrai mein phir jag uTha shoala-e-dard

munjamid tha jo mere gham ka samundar TuTa

dasht-e-ayyam se lauTi kisi ehsas ki gunj

mabad-e-jaan mein kisi wahm ka paikar TuTa

phir pur-asrar yaka yak hui KHamoshi-e-shab

phir koi jam kisi hath se gir kar TuTa

kasni dhup ke aansu meri aankhon se bahe

jaise ek mahr-e-daraKHshan mere andar TuTa

ghul machate hue rangon ke parinde nikle

sang-e-hairat se jab aaina-e-manzar TuTa

gumbad-e-gosh mein gunji phir ek aawaz-e-shikast

kya KHabar ye mera dil TuTa ki saghar TuTa