shahr-e-KHuban se jo hum ab bhi guzar aate hain

shahr-e-ḳhūbāñ se jo ham ab bhī guzar aate haiñ

kitne dhundlā.e hue naqsh ubhar aate haiñ

raat jā chhuptī hai sunsān jazīroñ meñ kahīñ

raat ke ḳhvāb mirī ruuh meñ dar aate haiñ

sehr-andāz hai kyā nīm-nigāhī terī

ek se kāfir-o-dīñ-dār nazar aate haiñ

kis ko sach kahiyegā kis ruup ko jhuTlā.iyegā

aa.ine meñ to ka.ī aks utar aate haiñ

ek muddat se haiñ is shahr meñ ham āvāra

bām-o-dar aaj bhī anjān nazar aate haiñ

vo bulāte to haiñ 'shāhīn' sar-e-bām magar

ham hī kuchh soch ke zīnoñ se utar aate haiñ

shahr-e-KHuban se jo hum ab bhi guzar aate hain

kitne dhundlae hue naqsh ubhar aate hain

raat ja chhupti hai sunsan jaziron mein kahin

raat ke KHwab meri ruh mein dar aate hain

sehr-andaz hai kya nim-nigahi teri

ek se kafir-o-din-dar nazar aate hain

kis ko sach kahiyega kis rup ko jhuTlaiyega

aaine mein to kai aks utar aate hain

ek muddat se hain is shahr mein hum aawara

baam-o-dar aaj bhi anjaan nazar aate hain

wo bulate to hain 'shahin' sar-e-baam magar

hum hi kuchh soch ke zinon se utar aate hain