شہر مظلوم میں اک شخص بھی برہم نہ ملا

شہر مظلوم میں اک شخص بھی برہم نہ ملا

خوف اتنا تھا کوئی پیکر ماتم نہ ملا

مان لوں کیسے کھلے گا گل امید مرا

برگ الفت پہ مجھے قطرۂ شبنم نہ ملا

جو مرے زخم اذیت کا مداوا کرتا

چارہ گر تھک گئے ایسا کوئی مرہم نہ ملا

شکوۂ گردش حالات سے حاصل کیا ہے

دست تقدیر سے جو کچھ بھی ملا کم نہ ملا

کٹ گئی عمر اسی ایک تجسس میں مری

بزم عالم میں کہیں امن کا عالم نہ ملا

باغ ہستی مرا ویران رہا ہے دائم

زندگی بھر مجھے برسات کا موسم نہ ملا

کون کہتا ہے گرا اشک ندامت ساحلؔ

زاہد خشک کا دامن تو مجھے نم نہ ملا