shahr-e-mazlum mein ek shaKHs bhi barham na mila

shahr-e-mazlūm meñ ik shaḳhs bhī barham na milā

ḳhauf itnā thā koī paikar-e-mātam na milā

maan luuñ kaise khilegā gul-e-ummīd mirā

barg-e-ulfat pe mujhe qatra-e-shabnam na milā

jo mire zaḳhm-e-aziyyat kā mudāvā kartā

chārāgar thak ga.e aisā koī marham na milā

shikva-e-gardish-e-hālāt se hāsil kyā hai

dast-e-taqdīr se jo kuchh bhī milā kam na milā

kaT ga.ī 'umr isī ek tajassus meñ mirī

bazm-e-ālam meñ kahīñ amn kā 'ālam na milā

bāġh-e-hastī mirā vīrān rahā hai daa.im

zindagī bhar mujhe barsāt kā mausam na milā

kaun kahtā hai girā ashk-e-nadāmat 'sāhil'

zāhid-e-ḳhushk kā dāman to mujhe nam na milā

shahr-e-mazlum mein ek shaKHs bhi barham na mila

KHauf itna tha koi paikar-e-matam na mila

man lun kaise khilega gul-e-ummid mera

barg-e-ulfat pe mujhe qatra-e-shabnam na mila

jo mere zaKHm-e-aziyyat ka mudawa karta

chaaragar thak gae aisa koi marham na mila

shikwa-e-gardish-e-haalat se hasil kya hai

dast-e-taqdir se jo kuchh bhi mila kam na mila

kaT gai 'umr isi ek tajassus mein meri

bazm-e-alam mein kahin amn ka 'alam na mila

bagh-e-hasti mera viran raha hai daim

zindagi bhar mujhe barsat ka mausam na mila

kaun kahta hai gira ashk-e-nadamat 'sahil'

zahid-e-KHushk ka daman to mujhe nam na mila