shahr-e-wafa mein apna koi aashna na tha

shahr-e-vafā meñ apnā koī āshnā na thā

maiñ thā akelā saath koī rahnumā na thā

rūdād-e-ahd-e-rafta sunā.ī thī maiñ ne jab

aañsū kisī kī aañkh meñ Thahrā huā na thā

sūraj thā apnī fahm kā aisā bujhā bujhā

jaise ki raushnī kā use tajraba na thā

jangal meñ aarzū ke bhaTaktā thā ik gadā

yaad us ko apne shahr-e-amāñ kā pata na thā

maiñ to azal se vaqt ke zindāñ meñ qaid thā

duniyā-e-rang-o-bū se koī rābta na thā

sīñchā thā maiñ ne nahr-e-gumāñ se yaqīñ kā aab

lekin hunar ke khet meñ paudā ugā na thā

ā.īna apne ḳhvāb-e-hasīñ kā thā rū-ba-rū

chehra magar zamīr kā mujh se chhupā na thā

shahr-e-wafa mein apna koi aashna na tha

main tha akela sath koi rahnuma na tha

rudad-e-ahd-e-rafta sunai thi main ne jab

aansu kisi ki aankh mein Thahra hua na tha

suraj tha apni fahm ka aisa bujha bujha

jaise ki raushni ka use tajraba na tha

jangal mein aarzu ke bhaTakta tha ek gada

yaad us ko apne shahr-e-aman ka pata na tha

main to azal se waqt ke zindan mein qaid tha

duniya-e-rang-o-bu se koi rabta na tha

sincha tha main ne nahr-e-guman se yaqin ka aab

lekin hunar ke khet mein pauda uga na tha

aaina apne KHwab-e-hasin ka tha ru-ba-ru

chehra magar zamir ka mujh se chhupa na tha