shahr-e-wahshat meri tanhai mujhe wapas kar

shahr-e-vahshat mirī tanhā.ī mujhe vāpas kar

haañ tujhī se kahā harjā.ī mujhe vāpas kar

merī bujhtī huī āñkhoñ kā sabab hai tū hī

mujh ko chhū kar mirī bīnā.ī mujhe vāpas kar

merī peshānī pe rakhe hue bose apne

poñchh le jā mirī dānā.ī mujhe vāpas kar

terī nafrat tire ḳhanjar hoñ mubārak tujh ko

maiñ masīhā thā masīhā.ī mujhe vāpas kar

us ne jaate hue kyā-kyā na kahā par mujh ko

bas yahī baat samajh aa.ī mujhe vāpas kar

mauj-e-ḳhūñ sar se guzarne kī ghaḌī aa.ī hai

zaḳhm kahtā hai ye purvā.ī mujhe vāpas kar

shahr-e-wahshat meri tanhai mujhe wapas kar

han tujhi se kaha harjai mujhe wapas kar

meri bujhti hui aankhon ka sabab hai tu hi

mujh ko chhu kar meri binai mujhe wapas kar

meri peshani pe rakhe hue bose apne

ponchh le ja meri danai mujhe wapas kar

teri nafrat tere KHanjar hon mubarak tujh ko

main masiha tha masihai mujhe wapas kar

us ne jate hue kya-kya na kaha par mujh ko

bas yahi baat samajh aai mujhe wapas kar

mauj-e-KHun sar se guzarne ki ghaDi aai hai

zaKHm kahta hai ye purwai mujhe wapas kar