shahr ka shahr luTera hai nazar mein rakhiye

shahr kā shahr luTerā hai nazar meñ rakhiye

ab matā-e-ġham-e-jānāñ bhī na ghar meñ rakhiye

kyā ḳhabar kaun se raste meñ vo rahzan mil jaa.e

apnā saaya bhī na ab saath safar meñ rakhiye

ab kahīñ se na ḳharīdār-e-vafā aa.egā

ab koī jins na bāzār-e-hunar meñ rakhiye

sar-e-dīvār vo ḳhurshīd-ba-kaf aayā hai

ab charāġh-e-dil-o-jāñ rāhguzar meñ rakhiye

sho.ala-e-dard liye dil-zadagāñ nikle haiñ

ab koī aag na.ī barq-o-sharar meñ rakhiye

chashma-e-chashm pe 'mohsin' vo nahāne aayā

ab sadā us ko isī dīda-e-tar meñ rakhiye

shahr ka shahr luTera hai nazar mein rakhiye

ab mata-e-gham-e-jaanan bhi na ghar mein rakhiye

kya KHabar kaun se raste mein wo rahzan mil jae

apna saya bhi na ab sath safar mein rakhiye

ab kahin se na KHaridar-e-wafa aaega

ab koi jins na bazar-e-hunar mein rakhiye

sar-e-diwar wo KHurshid-ba-kaf aaya hai

ab charagh-e-dil-o-jaan rahguzar mein rakhiye

shoala-e-dard liye dil-zadagan nikle hain

ab koi aag nai barq-o-sharar mein rakhiye

chashma-e-chashm pe 'mohsin' wo nahane aaya

ab sada us ko isi dida-e-tar mein rakhiye