shahr ko chhoD do aur ganw ko jao tum bhi

shahr ko chhoḌ do aur gaañv ko jaao tum bhī

is ta.alluq ke takalluf ko uThāo tum bhī

aag jañgal meñ bhaḌak jā.egī kal shaam talak

aaj bādal ko adāoñ se lubhāo tum bhī

dūsre chehre mujhe kam haiñ rifāqat ke liye

merī ḳhātir koī chehra to sajāo tum bhī

maiñ kahīñ sabza-e-ḳhud-rau kī tarah ug aa.uuñ

aur vahīñ phuul kī sūrat nikal aao tum bhī

mere hāthoñ meñ tire naam kī koī rekhā

tere hāthoñ meñ na aa.ī ho dikhāo tum bhī

chāñd ko rok diyā maiñ ne in hāthoñ meñ 'suhail'

tum mujhe rok lo jaadū ye dikhāo tum bhī

shahr ko chhoD do aur ganw ko jao tum bhi

is talluq ke takalluf ko uThao tum bhi

aag jangal mein bhaDak jaegi kal sham talak

aaj baadal ko adaon se lubhao tum bhi

dusre chehre mujhe kam hain rifaqat ke liye

meri KHatir koi chehra to sajao tum bhi

main kahin sabza-e-KHud-rau ki tarah ug aaun

aur wahin phul ki surat nikal aao tum bhi

mere hathon mein tere nam ki koi rekha

tere hathon mein na aai ho dikhao tum bhi

chand ko rok diya main ne in hathon mein 'suhail'

tum mujhe rok lo jadu ye dikhao tum bhi