shahr lagta hai bayaban mujhe

shahr lagtā hai bayābān mujhe

kahīñ miltā nahīñ insān mujhe

maiñ tirā naqsh-e-qadam huuñ ai dost

apne andāz se pahchān mujhe

maiñ tujhe jaan samajh baiThā huuñ

apne saa.e kī tarah jaan mujhe

tū kahāñ hai ki tire parde meñ

liye phirtā hai tirā dhyān mujhe

terī ḳhushbū ko sabā laa.ī thī

kar ga.ī aur pareshān mujhe

sar-o-sāmān-e-do-ālam huuñ maiñ

kyuuñ kaho be-sar-o-sāmān mujhe

merī hastī tirā afsāna thī

maut ne de diyā unvān mujhe

dil kī dhaḌkan pe gumāñ hotā hai

DhūñDhtā hai koī har-ān mujhe

maiñ bhī ā.īna huuñ terā lekin

tū ne dekhā kabhī hairān mujhe

un kī nisbat kā karishma hai 'zafar'

kahte haiñ yūsuf-e-kan.ān mujhe

shahr lagta hai bayaban mujhe

kahin milta nahin insan mujhe

main tera naqsh-e-qadam hun ai dost

apne andaz se pahchan mujhe

main tujhe jaan samajh baiTha hun

apne sae ki tarah jaan mujhe

tu kahan hai ki tere parde mein

liye phirta hai tera dhyan mujhe

teri KHushbu ko saba lai thi

kar gai aur pareshan mujhe

sar-o-saman-e-do-alam hun main

kyun kaho be-sar-o-saman mujhe

meri hasti tera afsana thi

maut ne de diya unwan mujhe

dil ki dhaDkan pe guman hota hai

DhunDhta hai koi har-an mujhe

main bhi aaina hun tera lekin

tu ne dekha kabhi hairan mujhe

un ki nisbat ka karishma hai 'zafar'

kahte hain yusuf-e-kanan mujhe