shahr mein hazrat-e-dil chaak-e-gareban kaisa

shahr meñ hazrat-e-dil chāk-e-garebāñ kaisā

hosh meñ aao bhalā ghar meñ bayābāñ kaisā

khul ga.e zaḳhm ḳhayāl-e-lab-e-ḳhandāñ kaisā

aur baḌh jaa.e agar dard to darmāñ kaisā

qat.a jaama huā dāman ke qarīñ chaak sile

dekhiye rahtā hai andāz-e-garebāñ kaisā

dil jigar se hai alag aur jigar jaañ se alag

aaj ek majma.a kā majma.a hai pareshāñ kaisā

ḳhāk-e-āshiq hai ki uTh uTh ke qadam letī hai

aur vo jaatā hai uThā.e hue dāmāñ kaisā

mai-kashoñ kā hai ḳhudā hāfiz-o-nāsir har dam

kashtī-e-mai ke liye nuuh kā tūfāñ kaisā

dil meñ kuchh ishq-e-sanam til ke barābar hī sahī

kufr itnā bhī na ho jis meñ musalmāñ kaisā

muzhda ai dast-e-junūñ jaama abhī baaqī hai

chāk-e-dāman se nikal aaya garebāñ kaisā

ho chukā hashr qayāmat kā zamāna guzrā

thā ilāhī but-e-bad-ahd kā paimāñ kaisā

'sho.ala' piirī meñ kisī zulf kā saudā kyā ḳhuub

sub.h ke vaqt hai ye ḳhvāb-e-pareshāñ kaisā

shahr mein hazrat-e-dil chaak-e-gareban kaisa

hosh mein aao bhala ghar mein bayaban kaisa

khul gae zaKHm KHayal-e-lab-e-KHandan kaisa

aur baDh jae agar dard to darman kaisa

qata jama hua daman ke qarin chaak sile

dekhiye rahta hai andaz-e-gareban kaisa

dil jigar se hai alag aur jigar jaan se alag

aaj ek majma ka majma hai pareshan kaisa

KHak-e-ashiq hai ki uTh uTh ke qadam leti hai

aur wo jata hai uThae hue daman kaisa

mai-kashon ka hai KHuda hafiz-o-nasir har dam

kashti-e-mai ke liye nuh ka tufan kaisa

dil mein kuchh ishq-e-sanam til ke barabar hi sahi

kufr itna bhi na ho jis mein musalman kaisa

muzhda ai dast-e-junun jama abhi baqi hai

chaak-e-daman se nikal aaya gareban kaisa

ho chuka hashr qayamat ka zamana guzra

tha ilahi but-e-bad-ahd ka paiman kaisa

'shoala' piri mein kisi zulf ka sauda kya KHub

subh ke waqt hai ye KHwab-e-pareshan kaisa