shahr mein milte hain mushkil se kahin chaar kandhe bhi uThane ke liye

shahr meñ milte haiñ mushkil se kahīñ chaar kāñdhe bhī uThāne ke liye

gaañv meñ gaañv kā gaañv aatā hai saath shamshān ko jaane ke liye

gaañv lauTā na dulārā maañ kā kar ke tā'līm mukammal apnī

khet sab rakh diye girvī apne baap ne jis ko paḌhāne ke liye

īñT-patthar kī imārat kā kyā kuchh hī din meñ hai khaḌī ho jaatī

'umr lag jaatī hai lekin yaaro ghar ko ghar jaisā banāne ke liye

shahr meñ amn bahālī ke liye aaj T.v pe hai kī jis ne appeal

kal usī ne to ishāra thā kiyā aag bastī meñ lagāne ke liye

dostī gar nahīñ mumkin na sahī dushmanī kis liye paalī jaa.e

dil se dil milnā zarūrī to nahīñ haath se haath milāne ke liye

dekhnā vo bhī na luT jaa.e kahīñ chor jo chhoḌ ga.e haiñ baaqī

ai 'sadā' soch ke jaanā to zarā rapaT thāne meñ likhāne ke liye

shahr mein milte hain mushkil se kahin chaar kandhe bhi uThane ke liye

ganw mein ganw ka ganw aata hai sath shamshan ko jaane ke liye

ganw lauTa na dulara man ka kar ke ta'lim mukammal apni

khet sab rakh diye girwi apne bap ne jis ko paDhane ke liye

inT-patthar ki imarat ka kya kuchh hi din mein hai khaDi ho jati

'umr lag jati hai lekin yaro ghar ko ghar jaisa banane ke liye

shahr mein amn bahaali ke liye aaj Tw pe hai ki jis ne appeal

kal usi ne to ishaara tha kiya aag basti mein lagane ke liye

dosti gar nahin mumkin na sahi dushmani kis liye pali jae

dil se dil milna zaruri to nahin hath se hath milane ke liye

dekhna wo bhi na luT jae kahin chor jo chhoD gae hain baqi

ai 'sada' soch ke jaana to zara rapaT thane mein likhane ke liye