shahr mein shor hai us shoKH ke aa jaane ka

shahr meñ shor hai us shoḳh ke aa jaane kā

har koī ruup bhare phirtā hai dīvāne kā

rind-o-vā.iz the baham dast-o-garebāñ kal raat

jaane kyā haal huā shīsha-o-paimāne kā

shab kā aalam thā judā din ke taqāze kuchh aur

us se kyā zikr kareñ raat ke afsāne kā

tar-ba-tar ḳhuun meñ hai dāman-e-ummīd-e-bahār

haath meñ zaḳhm hai TuuTe hue paimāne kā

us kī āñkhoñ meñ vahī rañg vahī husn-e-talab

dil ko samjhā.eñ magar fā.eda samjhāne kā

sahn masjid kā hai aur 'hāfiz'-o-'ḳhayyām' ke sher

jām-e-ġhāyab meñ magar rañg hai mai-ḳhāne kā

shahr mein shor hai us shoKH ke aa jaane ka

har koi rup bhare phirta hai diwane ka

rind-o-waiz the baham dast-o-gareban kal raat

jaane kya haal hua shisha-o-paimane ka

shab ka aalam tha juda din ke taqaze kuchh aur

us se kya zikr karen raat ke afsane ka

tar-ba-tar KHun mein hai daman-e-ummid-e-bahaar

hath mein zaKHm hai TuTe hue paimane ka

us ki aankhon mein wahi rang wahi husn-e-talab

dil ko samjhaen magar faeda samjhane ka

sahn masjid ka hai aur 'hafiz'-o-'KHayyam' ke sher

jam-e-ghayab mein magar rang hai mai-KHane ka