shaida-e-justuju hun talash-e-samar nahin

shaidā-e-justujū huuñ talāsh-e-samar nahīñ

mujh ko ye ġham nahīñ ki duā meñ asar nahīñ

shikva kisī se kyā ho shikāyat kisī se kyā

mahv-e-ḳhayāl-e-yār huuñ apnī ḳhabar nahīñ

apnā nahīñ hai hosh mujhe terī yaad hai

be-ḳhud huuñ be-ḳhudī hai magar be-ḳhabar nahīñ

koī kamī zarūr mohabbat meñ hai kahīñ

mumkin nahīñ ki dard idhar ho udhar nahīñ

jab dil meñ tū hī tū hai tujhe DhūñDhte haiñ kyoñ

dair-o-haram bane haiñ magar terā ghar nahīñ

koī bhī kār-e-ḳhair kisī se na ban paḌe

itnā to zindagī kā safar muḳhtasar nahīñ

kyā ḳhud kaheñ kisī se 'sadaf' meñ guhar bhī hai

sunte haiñ is dayār meñ ahl-e-nazar nahīñ

shaida-e-justuju hun talash-e-samar nahin

mujh ko ye gham nahin ki dua mein asar nahin

shikwa kisi se kya ho shikayat kisi se kya

mahw-e-KHayal-e-yar hun apni KHabar nahin

apna nahin hai hosh mujhe teri yaad hai

be-KHud hun be-KHudi hai magar be-KHabar nahin

koi kami zarur mohabbat mein hai kahin

mumkin nahin ki dard idhar ho udhar nahin

jab dil mein tu hi tu hai tujhe DhunDhte hain kyon

dair-o-haram bane hain magar tera ghar nahin

koi bhi kar-e-KHair kisi se na ban paDe

itna to zindagi ka safar muKHtasar nahin

kya KHud kahen kisi se 'sadaf' mein guhar bhi hai

sunte hain is dayar mein ahl-e-nazar nahin