shaiKH sahib jo dar-e-pir-e-mughan se nikle

shaiḳh sāhib jo dar-e-pīr-e-muġhāñ se nikle

phir asar un kī du'āoñ meñ kahāñ se nikle

jaise sho'la sā koī un kī zabāñ se nikle

lafz nikle ki koī tiir kamāñ se nikle

vo yahāñ se ki vahāñ se ki vahāñ se nikle

dekhne vaale ye kahte the kahāñ se nikle

vo jo baste the mire dil meñ baḌī muddat se

utre nazroñ se vo aur dil ke makāñ se nikle

muddatoñ se the jo ḳhāmosh vahī bol paḌe

saikḌoñ lafz achānak se zabāñ se nikle

saath kuchh bhī na gayā daulat-o-‘izzat shohrat

haath ḳhālī hī vo 'ātif' ye jahāñ se nikle

shaiKH sahib jo dar-e-pir-e-mughan se nikle

phir asar un ki du'aon mein kahan se nikle

jaise sho'la sa koi un ki zaban se nikle

lafz nikle ki koi tir kaman se nikle

wo yahan se ki wahan se ki wahan se nikle

dekhne wale ye kahte the kahan se nikle

wo jo baste the mere dil mein baDi muddat se

utre nazron se wo aur dil ke makan se nikle

muddaton se the jo KHamosh wahi bol paDe

saikDon lafz achanak se zaban se nikle

sath kuchh bhi na gaya daulat-o-‘izzat shohrat

hath KHali hi wo 'atif' ye jahan se nikle