shajar bolte hain hajar bolte hain

shajar bolte haiñ hajar bolte haiñ

safar meñ mire ham-safar bolte haiñ

maiñ tanhā bhī rahtā huuñ mahv-e-takallum

mire ghar ke dīvār-o-dar bolte haiñ

zabāñ ko ijāzat na ho bolne kī

to be-sāḳhta bāl-o-par bolte haiñ

agar mas.ale anjuman meñ na suljheñ

to maidāñ meñ tīr-o-tabar bolte haiñ

ḳhudā is taraf hai ḳhudā.ī udhar hai

sanā-ḳhvān-e-mashriq kidhar bolte haiñ

hunar-mand karte nahīñ ḳhud-satā.ī

chhupe haiñ jo un meñ hunar bolte haiñ

shahīdoñ ke jismoñ se kyā pūchhte ho

rakhe tasht meñ un ke sar bolte haiñ

shajar bolte hain hajar bolte hain

safar mein mere ham-safar bolte hain

main tanha bhi rahta hun mahw-e-takallum

mere ghar ke diwar-o-dar bolte hain

zaban ko ijazat na ho bolne ki

to be-saKHta baal-o-par bolte hain

agar masale anjuman mein na suljhen

to maidan mein tir-o-tabar bolte hain

KHuda is taraf hai KHudai udhar hai

sana-KHwan-e-mashriq kidhar bolte hain

hunar-mand karte nahin KHud-satai

chhupe hain jo un mein hunar bolte hain

shahidon ke jismon se kya puchhte ho

rakhe tasht mein un ke sar bolte hain