shajar-e-umid bhi jal gaya wo wafa ki shaKH bhi jal gai

shajar-e-umīd bhī jal gayā vo vafā kī shāḳh bhī jal ga.ī

mire dil kā naqsha badal gayā mirī sub.h raat meñ Dhal ga.ī

vahī zindagī jo bahar-nafas jo bahar-qadam mire saath thī

kabhī merā saath bhī chhoḌ kar mirī manzileñ bhī badal ga.ī

na vo aarzū hai na justujū na koī tasavvur-e-rañg-o-bū

liye dil meñ dāġh-e-ġham-e-ḳhizāñ maiñ chaman se duur nikal ga.ī

tirī chaal puurī na ho sakī tirā vaar ḳhālī chalā gayā

zarā dekh gardish-e-āsmāñ ki maiñ girte girte sañbhal ga.ī

tirī chāhatoñ se sañvar ga.e ye mire jamāl ke aa.ine

maiñ gulāb ban ke mahak uThī maiñ shafaq ke rang meñ Dhal ga.ī

ye tilism-e-mausam-e-gul nahīñ ki ye mo'jiza hai bahār kā

vo kalī jo shāḳh se gir ga.ī vo sabā kī god meñ pal ga.ī

vahī sā.at-e-ġham-e-ārzū jo hamesha dil meñ basī rahī

hai ḳhudā kā shukr ki 'āfrīñ' vo hamāre sar se to Tal ga.ī

shajar-e-umid bhi jal gaya wo wafa ki shaKH bhi jal gai

mere dil ka naqsha badal gaya meri subh raat mein Dhal gai

wahi zindagi jo bahar-nafas jo bahar-qadam mere sath thi

kabhi mera sath bhi chhoD kar meri manzilen bhi badal gai

na wo aarzu hai na justuju na koi tasawwur-e-rang-o-bu

liye dil mein dagh-e-gham-e-KHizan main chaman se dur nikal gai

teri chaal puri na ho saki tera war KHali chala gaya

zara dekh gardish-e-asman ki main girte girte sanbhal gai

teri chahaton se sanwar gae ye mere jamal ke aaine

main gulab ban ke mahak uThi main shafaq ke rang mein Dhal gai

ye tilism-e-mausam-e-gul nahin ki ye mo'jiza hai bahaar ka

wo kali jo shaKH se gir gai wo saba ki god mein pal gai

wahi saat-e-gham-e-arzu jo hamesha dil mein basi rahi

hai KHuda ka shukr ki 'afrin' wo hamare sar se to Tal gai