شجر پہ سانپ ہے یا باغ میں شکاری ہے

شجر پہ سانپ ہے یا باغ میں شکاری ہے

یہ کیسی آج پرندوں میں بے قراری ہے

تمہارے لب پہ تھیں کل انقلاب کی باتیں

تمہارے لب پہ تو گریہ ہے آہ و زاری ہے

عجب نہ تھا صف اول میں ہم نظر آتے

مگر یہ راہ میں حائل جو خاکساری ہے

یہ معرکے تو سیاست کے شاخسانے ہیں

نہ تو نے جیتی ہے بازی نہ میں نے ہاری ہے

کوئی گزارے تو دو دن میں جان سے گزرے

جو عمر ہم نے غم یار میں گزاری ہے

ہمارے حال پہ ان کی عنایتیں کم تھیں

جو دل پہ اب کے لگا ہے وہ زخم کاری ہے

کچھ ایسے نام ہیں شعر و سخن کی دنیا میں

کہ جن کی دھوم حقیقت میں اشتہاری ہے