شکل عزت مآب کی سی ہے

شکل عزت مآب کی سی ہے

دل میں بھٹی شراب کی سی ہے

یوں نشاں ہے جبیں پہ سجدے کا

ٹکیا شامی کباب کی سی ہے

ریڈیو پر سنی جو نظم کہا

شاعر انقلاب کی سی ہے

بولا کوئی گدھا کہا آواز

اسی خانہ خراب کی سی ہے

اب حسینوں کی شکل میکپ سے

سنیما کی کتاب کی سی ہے

آپ کے میرے کوئی ہے رشتہ

بات جیسے حجاب کی سی ہے

اٹھ گئے جو ادیب ان کی مثال

آسمانی کتاب کی سی ہے

اہل فن نے سنی ہزل تو کہا

یہ تو غالبؔ نواب کی سی ہے

ناوکؔ اردو زبان کی حالت

آج گونگے کے خواب کی سی ہے