شمع جاں ہوگی نہ فانوس نظر رہ جائے گا

شمع جاں ہوگی نہ فانوس نظر رہ جائے گا

یہ بھی کیا کم ہے کہ خوابوں کا سفر رہ جائے گا

اے ہوائے زرگری اے کوچہ سوداگری

کیا نواح دل میں کوئی شیشہ گر رہ جائے گا

داغ دامن کے تو دھل جائیں گے سب اک دن مگر

ایک دھبہ ہے جو خون دل میں تر رہ جائے گا

اے فسون آگہی یہ بد دعا کس کی لگی

آدمی ہی آدمی سے بے خبر رہ جائے گا

ہجرتیں کیسی بھی ہوں جب بھی پلٹ کر آؤ گے

گھر تو کیا پاؤ گے بس دیوار و در رہ جائے گا

اے فصیل شہر جاں تو نے ہمیشہ دی اماں

اب جو ہے تو سرنگوں کیا یہ نگر رہ جائے گا