sham-e-jaan hogi na fanus-e-nazar rah jaega

sham-e-jāñ hogī na fānūs-e-nazar rah jā.egā

ye bhī kyā kam hai ki ḳhvāboñ kā safar rah jā.egā

ai havā-e-zar-garī ai kūcha-e-saudāgarī

kyā navāh-e-dil meñ koī shīshagar rah jā.egā

daaġh dāman ke to dhul jā.eñge sab ik din magar

ek dhabba hai jo ḳhūn-e-dil meñ tar rah jā.egā

ai fusūn-e-āgahī ye badduā kis kī lagī

aadmī hī aadmī se be-ḳhabar rah jā.egā

hijrateñ kaisī bhī hoñ jab bhī palaT kar aaoge

ghar to kyā pāoge bas dīvār-o-dar rah jā.egā

ai fasīl-e-shahr-e-jāñ tū ne hamesha dī amaañ

ab jo hai to sar-nigūñ kyā ye nagar rah jā.egā

sham-e-jaan hogi na fanus-e-nazar rah jaega

ye bhi kya kam hai ki KHwabon ka safar rah jaega

ai hawa-e-zar-gari ai kucha-e-saudagari

kya nawah-e-dil mein koi shishagar rah jaega

dagh daman ke to dhul jaenge sab ek din magar

ek dhabba hai jo KHun-e-dil mein tar rah jaega

ai fusun-e-agahi ye baddua kis ki lagi

aadmi hi aadmi se be-KHabar rah jaega

hijraten kaisi bhi hon jab bhi palaT kar aaoge

ghar to kya paoge bas diwar-o-dar rah jaega

ai fasil-e-shahr-e-jaan tu ne hamesha di aman

ab jo hai to sar-nigun kya ye nagar rah jaega