sham-e-kushta ki tarah main teri mahfil se uTha

sham-e-kushta kī tarah maiñ tirī mahfil se uThā

aah kaisī vo dhuāñ thā jo bujhe dil se uThā

khel hai hasti-e-mauhūm magar hai dilchasp

jo yahāñ baiTh gayā aa ke vo mushkil se uThā

tū ne ye kis ko uThāyā hai ki dil baiTh ga.e

kaun baiThā hai ki fitna tirī mahfil se uThā

kaun ġharqāb huā hai ki uḌātā huā ḳhaak

aaj be-tāb bagūlā lab-e-sāhil se uThā

ham-safar hai koī uftād to pesh aane ko

ki qadam aaj ulajhtā huā manzil se uThā

jī churāne kī nahīñ shart dil-e-zār yahāñ

rañj uThāne hī kī Thahrī hai to phir dil se uThā

ahl-e-haq bhī yahīñ mil jā.eñge uTh to 'nātiq'

haq kī āvāz to but-ḳhāna-e-bātil se uThā

sham-e-kushta ki tarah main teri mahfil se uTha

aah kaisi wo dhuan tha jo bujhe dil se uTha

khel hai hasti-e-mauhum magar hai dilchasp

jo yahan baiTh gaya aa ke wo mushkil se uTha

tu ne ye kis ko uThaya hai ki dil baiTh gae

kaun baiTha hai ki fitna teri mahfil se uTha

kaun gharqab hua hai ki uData hua KHak

aaj be-tab bagula lab-e-sahil se uTha

ham-safar hai koi uftad to pesh aane ko

ki qadam aaj ulajhta hua manzil se uTha

ji churane ki nahin shart dil-e-zar yahan

ranj uThane hi ki Thahri hai to phir dil se uTha

ahl-e-haq bhi yahin mil jaenge uTh to 'natiq'

haq ki aawaz to but-KHana-e-baatil se uTha