sham se thi jo ziya ki ummid

sham' se thī jo ziyā kī ummīd

le ga.ī us ko sabā kī ummīd

'ahd-o-paimān vahī toḌ ga.e

ham ko jin se thī balā kī ummīd

ab kisī aur kā muñh kyā dekheñ

ham ko hai tujh se du'ā kī ummīd

zahr dene pe utar aa.e haiñ vo

jin se rakkhī thī davā kī ummīd

aadmī huuñ maiñ farishta na samajh

har bashar se hai ḳhatā kī ummīd

hausla past huā raah meñ jab

'ishq ne tere 'atā kī ummīd

mahv-e-hairat huuñ vahī kaam aa.e

jin se mujh ko thī daġhā kī ummīd

zindagānī kā bharosa kyā hai

har nafas rakhiye qazā kī ummīd

tum bhī nādān ho kitne 'faisal'

be-vafāoñ se vafā kī ummīd

sham' se thi jo ziya ki ummid

le gai us ko saba ki ummid

'ahd-o-paiman wahi toD gae

hum ko jin se thi bala ki ummid

ab kisi aur ka munh kya dekhen

hum ko hai tujh se du'a ki ummid

zahr dene pe utar aae hain wo

jin se rakkhi thi dawa ki ummid

aadmi hun main farishta na samajh

har bashar se hai KHata ki ummid

hausla past hua rah mein jab

'ishq ne tere 'ata ki ummid

mahw-e-hairat hun wahi kaam aae

jin se mujh ko thi dagha ki ummid

zindagani ka bharosa kya hai

har nafas rakhiye qaza ki ummid

tum bhi nadan ho kitne 'faisal'

be-wafaon se wafa ki ummid