sham tu ye to bata pas tere aane mein

sham' tū ye to batā paas tire aane meñ

jaan de detā hai parvāna kyoñ nazrāne meñ

dil to ham de hī chuke aap ko nazrāne meñ

jaan baaqī hai magar aap ke dīvāne meñ

vaqt kaisā bhī ho dhīre se guzar jaatā hai

vaqt lagtā nahīñ hai vaqt guzar jaane meñ

aaj mumkin hai vo laḌkī mujhe tarjīh na de

kal magar naam mirā aa.egā dīvāne meñ

zindagī zulf nahīñ thī jo sañvārī jaatī

zindagī aur ulajhtī ga.ī suljhāne meñ

rādhikā ko thā yaqīñ jab bhī pukāregī use

nand kā laal chalā aa.egā barsāne meñ

bas isī baat pe hangāma yahāñ barpā hai

maiñ chhalaktā rahā vo Dhal gayā paimāne meñ

itnī mushkil to na thī merī kahānī phir bhī

'umr kyoñ biit ga.ī aap ko samjhāne meñ

sham' tu ye to bata pas tere aane mein

jaan de deta hai parwana kyon nazrane mein

dil to hum de hi chuke aap ko nazrane mein

jaan baqi hai magar aap ke diwane mein

waqt kaisa bhi ho dhire se guzar jata hai

waqt lagta nahin hai waqt guzar jaane mein

aaj mumkin hai wo laDki mujhe tarjih na de

kal magar nam mera aaega diwane mein

zindagi zulf nahin thi jo sanwari jati

zindagi aur ulajhti gai suljhane mein

radhika ko tha yaqin jab bhi pukaregi use

nand ka lal chala aaega barsane mein

bas isi baat pe hangama yahan barpa hai

main chhalakta raha wo Dhal gaya paimane mein

itni mushkil to na thi meri kahani phir bhi

'umr kyon bit gai aap ko samjhane mein