شمع تو یہ تو بتا پاس ترے آنے میں

شمع تو یہ تو بتا پاس ترے آنے میں

جان دے دیتا ہے پروانہ کیوں نذرانے میں

دل تو ہم دے ہی چکے آپ کو نذرانے میں

جان باقی ہے مگر آپ کے دیوانے میں

وقت کیسا بھی ہو دھیرے سے گزر جاتا ہے

وقت لگتا نہیں ہے وقت گزر جانے میں

آج ممکن ہے وہ لڑکی مجھے ترجیح نہ دے

کل مگر نام مرا آئے گا دیوانے میں

زندگی زلف نہیں تھی جو سنواری جاتی

زندگی اور الجھتی گئی سلجھانے میں

رادھکا کو تھا یقیں جب بھی پکارے گی اسے

نند کا لال چلا آئے گا برسانے میں

بس اسی بات پہ ہنگامہ یہاں برپا ہے

میں چھلکتا رہا وہ ڈھل گیا پیمانے میں

اتنی مشکل تو نہ تھی میری کہانی پھر بھی

عمر کیوں بیت گئی آپ کو سمجھانے میں