shama sar dhunti rahi mahfil mein parwanon ke sath

sham.a sar dhuntī rahī mahfil meñ parvānoñ ke saath

aap yaad aate rahe kuchh talḳh unvānoñ ke saath

shām-e-ġham shām-e-judā.ī dard-e-dil dard-e-jigar

saare qisse ḳhatm ho jā.eñge dīvānoñ ke saath

shīsha-o-paimāna hī zebā.ish-e-mai-ḳhāna haiñ

chheḌ shīshe kī nahīñ achchhī hai paimānoñ ke saath

kaisā vo dilchasp manzar hogā ai jān-e-azīz

vo hoñ sāhil pe khaḌe aur ham hoñ tūfānoñ ke saath

ham na hoñge par hamārī dāstāñ rah jā.egī

yaad ham aayā kareñge apne afsānoñ ke saath

bāda-e-irfāñ kā sāġhar le ke 'ārif' haath meñ

sū-e-mai-ḳhāna chalā hai aaj farzānoñ ke saath

shama sar dhunti rahi mahfil mein parwanon ke sath

aap yaad aate rahe kuchh talKH unwanon ke sath

sham-e-gham sham-e-judai dard-e-dil dard-e-jigar

sare qisse KHatm ho jaenge diwanon ke sath

shisha-o-paimana hi zebaish-e-mai-KHana hain

chheD shishe ki nahin achchhi hai paimanon ke sath

kaisa wo dilchasp manzar hoga ai jaan-e-aziz

wo hon sahil pe khaDe aur hum hon tufanon ke sath

hum na honge par hamari dastan rah jaegi

yaad hum aaya karenge apne afsanon ke sath

baada-e-irfan ka saghar le ke 'arif' hath mein

su-e-mai-KHana chala hai aaj farzanon ke sath