shanaKHt miT gai chehre pe gard itni thi

shanāḳht miT ga.ī chehre pe gard itnī thī

hamārī zindagī sahrā-navard itnī thī

tamām-umr use sīñchte rahe lekin

gulāb de na sakī shāḳh zard itnī thī

gire na ashk kabhī hādsoñ ke dāman par

hamārī aañkh shanāsā-e-dard itnī thī

tirī pukār kā chehra dikhā.ī de na sakā

mire qarīb sadāoñ kī gard itnī thī

talāsh-e-zīst meñ dil jaisī chiiz chhūT ga.ī

hikāyat-e-dil-o-jāñ fard fard itnī thī

jhulastī dhuup kā us par gumāñ guzartā thā

bichhī thī raah meñ jo chhāñv zard itnī thī

pighal sakī na kabhī barf akele-pan kī 'ḳhumār'

vo sho.ala-rū bhī tabī.at kī sard itnī thī

shanaKHt miT gai chehre pe gard itni thi

hamari zindagi sahra-naward itni thi

tamam-umr use sinchte rahe lekin

gulab de na saki shaKH zard itni thi

gire na ashk kabhi hadson ke daman par

hamari aankh shanasa-e-dard itni thi

teri pukar ka chehra dikhai de na saka

mere qarib sadaon ki gard itni thi

talash-e-zist mein dil jaisi chiz chhuT gai

hikayat-e-dil-o-jaan fard fard itni thi

jhulasti dhup ka us par guman guzarta tha

bichhi thi rah mein jo chhanw zard itni thi

pighal saki na kabhi barf akele-pan ki 'KHumar'

wo shoala-ru bhi tabiat ki sard itni thi