shanasa-e-rumuz-e-fitrat-e-gham hoti jati hai

shanāsā-e-rumūz-e-fitrat-e-ġham hotī jaatī hai

nishāt-o-kaif se bhī aañkh pur-nam hotī jaatī hai

maiñ jitnā chheḌtā jaatā huuñ apne barbat-e-dil ko

mirī āvāz ab utnī hī maddham hotī jaatī hai

machaltī hai nasīm-e-sub.h se āġhosh meñ paiham

guloñ se kis qadar be-bāk shabnam hotī jaatī hai

ye kaise jaam haiñ saaqī ki jitnī piitā jaatā huuñ

mirī tishna-labī utnī hī barham hotī jaatī hai

ilāhī kaun aaya hai bahāreñ le ke zindāñ meñ

nazar merī sarāpā ḳhair-maqdam hotī jaatī hai

sitam ke saath kuchh un kā karam hai mujh par ai 'mutrib'

mohabbat ab nishāt-o-ġham kā sangam hotī jaatī hai

shanasa-e-rumuz-e-fitrat-e-gham hoti jati hai

nishat-o-kaif se bhi aankh pur-nam hoti jati hai

main jitna chheDta jata hun apne barbat-e-dil ko

meri aawaz ab utni hi maddham hoti jati hai

machalti hai nasim-e-subh se aaghosh mein paiham

gulon se kis qadar be-bak shabnam hoti jati hai

ye kaise jam hain saqi ki jitni pita jata hun

meri tishna-labi utni hi barham hoti jati hai

ilahi kaun aaya hai bahaaren le ke zindan mein

nazar meri sarapa KHair-maqdam hoti jati hai

sitam ke sath kuchh un ka karam hai mujh par ai 'mutrib'

mohabbat ab nishat-o-gham ka sangam hoti jati hai