shanasa-e-salib-e-gham badan hai

shanāsā-e-salīb-e-ġham badan hai

ye apnā aap hī goyā kafan hai

mujhe rusvā kyā kam-mā.egī ne

mirā hī zarf mujh par ta.ana-zan hai

patā detī hai lau ye thartharā kar

fasurda-dil charāġh-e-anjuman hai

lagāo tohmat-e-isyāñ na is par

nahīñ yūsuf kā merā pairahan hai

azīz-e-misr aur qurb-e-zuleḳhā

nigār-e-ḳhvāb kā ye husn-e-zan hai

fidā.ī zindagī paa.eñ ajal se

ishāroñ kī yahī rasm-e-kohan hai

hamīñ ne zindagī teshe ko baḳhshī

hamīñ se azmat dār-o-rasan hai

kiyā zanjīr-e-pā mahmil-nashīñ ko

jabīn-e-vaqt par kaisī shikan hai

usī jalve se 'baḳht' āñkheñ haiñ raushan

vahī jalva nigāhoñ kā kafan hai

shanasa-e-salib-e-gham badan hai

ye apna aap hi goya kafan hai

mujhe ruswa kya kam-maegi ne

mera hi zarf mujh par tana-zan hai

pata deti hai lau ye tharthara kar

fasurda-dil charagh-e-anjuman hai

lagao tohmat-e-isyan na is par

nahin yusuf ka mera pairahan hai

aziz-e-misr aur qurb-e-zuleKHa

nigar-e-KHwab ka ye husn-e-zan hai

fidai zindagi paen ajal se

ishaaron ki yahi rasm-e-kohan hai

hamin ne zindagi teshe ko baKHshi

hamin se azmat dar-o-rasan hai

kiya zanjir-e-pa mahmil-nashin ko

jabin-e-waqt par kaisi shikan hai

usi jalwe se 'baKHt' aankhen hain raushan

wahi jalwa nigahon ka kafan hai