sharab-e-ishq se maKHmur sab KHurd-o-kalan honge

sharāb-e-ishq se maḳhmūr sab ḳhurd-o-kalāñ hoñge

tuyūr-e-bāġh-e-ulfat mahv-e-dīdār-e-butāñ hoñge

dil-e-shabnam meñ ummīdoñ kī kaliyāñ muskurā.eñgī

urūs-e-hajla-e-gulshan ke bhī armāñ javāñ hoñge

gale mil kar kareñge barg-o-gul sargoshiyāñ paiham

mohabbat ke manāzir dekhne ko bāġhbāñ hoñge

nasīm-e-sub.h meñ jis dam anādil chahchahā.eñge

bahāreñ ham ko DhūñDheñgī na jaane ham kahāñ hoñge

hamārī zindagī ko bojh jo ḳhud par samajhte haiñ

pas-e-furqat ba-sad hasrat vahī mahv-e-fuġhāñ hoñge

paḌegā vaqt jab un par to DhūñDheñge hameñ har sū

magar us vaqt ham shahr-e-ḳhamoshāñ meñ nihāñ hoñge

hamārī sarhad-e-tanhā.ī pe ro.egī tanhā.ī

baġhair-e-qāfila bhī ham amīr-e-kārvāñ hoñge

zarā ik baar jī bhar kar dar-o-dīvār takne do

mire tārīk hujre meñ ye nazzāre kahāñ hoñge

tumhārī vasf sun sun kar yahī mahsūs hotā hai

tumhāre nāznīñ gesū misāl-e-kahkashāñ hoñge

usī kī god meñ sar rakh ke maiñ aañsū bahā.ūñgā

tire naqsh-e-qadam jis ḳhaak ke dil meñ nihāñ hoñge

umīdoñ kī chaTāneñ jab baheñgī sail-e-ġhurbat meñ

ye manzar dekh kar sātoñ tabaq girya-kunāñ hoñge

inhī lamhoñ kī chāhat ne mujhe dī hai hayāt-e-nau

zamīñ kī god meñ jalva-numā jab āsmāñ hoñge

hamārī aarzū hai ek pal bāhoñ meñ bhar liije

ki kuchh hī der meñ ham raunaq-e-nok-e-sināñ hoñge

'falak' kī qabr par bhī fātiha paḌhne vo ā.eñge

zahe-qismat fasīl-e-ishq se jis dam ayaañ hoñge

sharab-e-ishq se maKHmur sab KHurd-o-kalan honge

tuyur-e-bagh-e-ulfat mahw-e-didar-e-butan honge

dil-e-shabnam mein ummidon ki kaliyan muskuraengi

urus-e-hajla-e-gulshan ke bhi arman jawan honge

gale mil kar karenge barg-o-gul sargoshiyan paiham

mohabbat ke manazir dekhne ko baghban honge

nasim-e-subh mein jis dam anadil chahchahaenge

bahaaren hum ko DhunDhengi na jaane hum kahan honge

hamari zindagi ko bojh jo KHud par samajhte hain

pas-e-furqat ba-sad hasrat wahi mahw-e-fughan honge

paDega waqt jab un par to DhunDhenge hamein har su

magar us waqt hum shahr-e-KHamoshan mein nihan honge

hamari sarhad-e-tanhai pe roegi tanhai

baghair-e-qafila bhi hum amir-e-karwan honge

zara ek bar ji bhar kar dar-o-diwar takne do

mere tarik hujre mein ye nazzare kahan honge

tumhaari wasf sun sun kar yahi mahsus hota hai

tumhaare naznin gesu misal-e-kahkashan honge

usi ki god mein sar rakh ke main aansu bahaunga

tere naqsh-e-qadam jis KHak ke dil mein nihan honge

umidon ki chaTanen jab bahengi sail-e-ghurbat mein

ye manzar dekh kar saton tabaq girya-kunan honge

inhi lamhon ki chahat ne mujhe di hai hayat-e-nau

zamin ki god mein jalwa-numa jab aasman honge

hamari aarzu hai ek pal bahon mein bhar lije

ki kuchh hi der mein hum raunaq-e-nok-e-sinan honge

'falak' ki qabr par bhi fatiha paDhne wo aaenge

zahe-qismat fasil-e-ishq se jis dam ayan honge