sharab KHun-e-jigar hai hum ko sharab hum le ke kya karenge

sharāb ḳhūn-e-jigar hai ham ko sharāb ham le ke kyā kareñge

gazak kī jā hai dil-e-birishta kabāb ham le ke kyā kareñge

hazār parde meñ tum chhupāo pa husn chhuptā nahīñ mirī jaañ

tumhāre aariz ye kah rahe haiñ naqāb ham le ke kyā kareñge

hamāre naqd-e-dil-o-jigar ko hisāb ke ba.ad pher deñge

hisāb lene kā un se hāsil hisāb ham le ke kyā kareñge

hameñ jo bhejā hai tum ne mus.haf to yaar harf-āshnā nahīñ ham

dikhāo apnā ruḳh-e-kitābī kitāb ham le ke kyā kareñge

butoñ kī ulfat se ba.az aa.eñ magar jo dil maan jaa.e vaa.iz

azaab meñ jaan paḌ ga.ī hai savāb ham le ke kyā kareñge

jo man.a kartā hai dil na deñge butoñ ko nāseh magar ḳhudārā

batā de tū hī ki is tarah kā azaab ham le ke kyā kareñge

ḳhudā kī baḳhshī huī hai vaq.at 'asar' nahīñ koī aisī ne.amat

milī hai jab izzat-e-siyādat ḳhitāb ham le ke kyā kareñge

sharab KHun-e-jigar hai hum ko sharab hum le ke kya karenge

gazak ki ja hai dil-e-birishta kabab hum le ke kya karenge

hazar parde mein tum chhupao pa husn chhupta nahin meri jaan

tumhaare aariz ye kah rahe hain naqab hum le ke kya karenge

hamare naqd-e-dil-o-jigar ko hisab ke baad pher denge

hisab lene ka un se hasil hisab hum le ke kya karenge

hamein jo bheja hai tum ne mushaf to yar harf-ashna nahin hum

dikhao apna ruKH-e-kitabi kitab hum le ke kya karenge

buton ki ulfat se baz aaen magar jo dil man jae waiz

azab mein jaan paD gai hai sawab hum le ke kya karenge

jo mana karta hai dil na denge buton ko naseh magar KHudara

bata de tu hi ki is tarah ka azab hum le ke kya karenge

KHuda ki baKHshi hui hai waqat 'asar' nahin koi aisi neamat

mili hai jab izzat-e-siyaadat KHitab hum le ke kya karenge