sharab mein hai na rangini-e-bahaar mein hai

sharāb meñ hai na rangīnī-e-bahār meñ hai

vo kaif-e-tauba-shikan jo shabāb-e-yār meñ hai

nasīhateñ tirī nāseh bajā sahī lekin

maiñ dil ke bas meñ huuñ dil un ke iḳhtiyār meñ hai

adā batātī hai kaliyoñ ke muskurāne kī

ki koī shoḳh-sarā parda-e-bahār meñ hai

nazar bhī ishq ke bande uThā nahīñ sakte

ki dil kā bhed nigāhoñ ke iḳhtiyār meñ hai

shikast-e-rang kā manzar bhī aa ke dekh kabhī

mirī ḳhizāñ meñ hai sab jo tirī bahār meñ hai

sharab mein hai na rangini-e-bahaar mein hai

wo kaif-e-tauba-shikan jo shabab-e-yar mein hai

nasihaten teri naseh baja sahi lekin

main dil ke bas mein hun dil un ke iKHtiyar mein hai

ada batati hai kaliyon ke muskurane ki

ki koi shoKH-sara parda-e-bahaar mein hai

nazar bhi ishq ke bande uTha nahin sakte

ki dil ka bhed nigahon ke iKHtiyar mein hai

shikast-e-rang ka manzar bhi aa ke dekh kabhi

meri KHizan mein hai sab jo teri bahaar mein hai