sharab o sher ke sanche mein Dhal ke aai hai

sharāb o sher ke sāñche meñ Dhal ke aa.ī hai

ye shaam kis kī galī se nikal ke aa.ī hai

samajh rahā huuñ sahar ke fareb-e-rañgīñ ko

nayā libās shab-e-ġham badal ke aa.ī hai

tire qadam kī bahak hai tirī qabā kī mahak

nasīm tere shabistāñ se chal ke aa.ī hai

vafā pe aañch na aatī agar tumhī kahte

zabāñ tak aaj jo ik baat chal ke aa.ī hai

sajī huī hai sitāroñ se mai-kade kī fazā

ki raat tere tasavvur meñ Dhal ke aa.ī hai

ba-ehtiyāt hamārī taraf uThī hai nigāh

laboñ pe mauj-e-tabassum sambhal ke aa.ī hai

hamārī aah hamāre hī dil kī aah nahīñ

na jaane kitne diloñ se nikal ke aa.ī hai

sahar tak aa to ga.ī sham.a tā-ba parvāna

magar harārat-e-ġham se pighal ke aa.ī hai

mirī nigāh-e-tamannā kā aks ho na 'shamīm'

kisī ke ruḳh pe jo surḳhī machal ke aa.ī hai

sharab o sher ke sanche mein Dhal ke aai hai

ye sham kis ki gali se nikal ke aai hai

samajh raha hun sahar ke fareb-e-rangin ko

naya libas shab-e-gham badal ke aai hai

tere qadam ki bahak hai teri qaba ki mahak

nasim tere shabistan se chal ke aai hai

wafa pe aanch na aati agar tumhi kahte

zaban tak aaj jo ek baat chal ke aai hai

saji hui hai sitaron se mai-kade ki faza

ki raat tere tasawwur mein Dhal ke aai hai

ba-ehtiyat hamari taraf uThi hai nigah

labon pe mauj-e-tabassum sambhal ke aai hai

hamari aah hamare hi dil ki aah nahin

na jaane kitne dilon se nikal ke aai hai

sahar tak aa to gai shama ta-ba parwana

magar hararat-e-gham se pighal ke aai hai

meri nigah-e-tamanna ka aks ho na 'shamim'

kisi ke ruKH pe jo surKHi machal ke aai hai