sharāb pī aur miTā ḳhudī ko agar ḳhayāl-e-savāb meñ hai
ki zohd-o-taqvā meñ vo kahāñ hai jo lutf shaġhl-e-sharāb meñ hai
na ho jise hosh ḳhud hī apnā use ho kyā dūsroñ kī parvā
kisī kī vo kis tarah ḳhabar le jo ḳhud hī josh-e-sharāb meñ hai
agar ye dil terā āstāñ hai to kyoñ pareshān-o-sargirāñ hai
jo tū mirī ruuh meñ nihāñ hai to ruuh kyoñ iztirāb meñ hai
ye sab 'ajīb-o-ġharīb shāneñ tire jamāl-o-jalāl kī haiñ
na koī ThanDak savāb meñ hai na koī garmī 'azāb meñ hai
lahad kī ḳhalvat meñ chāhtā huuñ ki tere jalvoñ se sair ho luuñ
maiñ kis tarah apnī aañkh kholūñ ki tū mirī chashm-e-ḳhvāb meñ hai
sukūn kī us se kyoñ du'ā hai fuzūl rāhat kī iltijā hai
vo apnī āñkhoñ se dekhtā hai ki ik jahāñ iztirāb meñ hai
vo shaad haiñ dekh kar tabāhī shagufta dil haiñ fasurdagī se
'umar' koī to bahār aisī hamāre hāl-e-ḳharāb meñ hai
sharab pi aur miTa KHudi ko agar KHayal-e-sawab mein hai
ki zohd-o-taqwa mein wo kahan hai jo lutf shaghl-e-sharab mein hai
na ho jise hosh KHud hi apna use ho kya dusron ki parwa
kisi ki wo kis tarah KHabar le jo KHud hi josh-e-sharab mein hai
agar ye dil tera aastan hai to kyon pareshan-o-sargiran hai
jo tu meri ruh mein nihan hai to ruh kyon iztirab mein hai
ye sab 'ajib-o-gharib shanen tere jamal-o-jalal ki hain
na koi ThanDak sawab mein hai na koi garmi 'azab mein hai
lahad ki KHalwat mein chahta hun ki tere jalwon se sair ho lun
main kis tarah apni aankh kholun ki tu meri chashm-e-KHwab mein hai
sukun ki us se kyon du'a hai fuzul rahat ki iltija hai
wo apni aankhon se dekhta hai ki ek jahan iztirab mein hai
wo shad hain dekh kar tabahi shagufta dil hain fasurdagi se
'umar' koi to bahaar aisi hamare haal-e-KHarab mein hai
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.