شراب پی اور مٹا خودی کو اگر خیال ثواب میں ہے

شراب پی اور مٹا خودی کو اگر خیال ثواب میں ہے

کہ زہد و تقویٰ میں وہ کہاں ہے جو لطف شغل شراب میں ہے

نہ ہو جسے ہوش خود ہی اپنا اسے ہو کیا دوسروں کی پروا

کسی کی وہ کس طرح خبر لے جو خود ہی جوش شراب میں ہے

اگر یہ دل تیرا آستاں ہے تو کیوں پریشان و سرگراں ہے

جو تو مری روح میں نہاں ہے تو روح کیوں اضطراب میں ہے

یہ سب عجیب و غریب شانیں ترے جمال و جلال کی ہیں

نہ کوئی ٹھنڈک ثواب میں ہے نہ کوئی گرمی عذاب میں ہے

لحد کی خلوت میں چاہتا ہوں کہ تیرے جلوؤں سے سیر ہو لوں

میں کس طرح اپنی آنکھ کھولوں کہ تو مری چشم خواب میں ہے

سکون کی اس سے کیوں دعا ہے فضول راحت کی التجا ہے

وہ اپنی آنکھوں سے دیکھتا ہے کہ اک جہاں اضطراب میں ہے

وہ شاد ہیں دیکھ کر تباہی شگفتہ دل ہیں فسردگی سے

عمرؔ کوئی تو بہار ایسی ہمارے حال خراب میں ہے