sharab pi kar diya hai tumne jo hum ko jam-e-sharab aadha

sharāb pī kar diyā hai tum ne jo ham ko jām-e-sharāb aadhā

azal se likkhā huā thā shāyad ki paa.eñ ham tum savāb aadhā

gale lagā kar liyā thā bosa hue the raazī visāl par bhī

taḌap ne dil ko jagā diyā kyoñ abhī to dekhā thā ḳhvāb aadhā

falak se kah do sahar qarīñ hai ga.ī vo zulmat huī shab āḳhir

shafaq hinā le ke aap aa.e ki uḌ gayā hai ḳhizāb aadhā

yahāñ hai zoroñ pe nā-tavānī vahāñ nazākat se baat mushkil

na kis tarah ho savāl aadhā na kis tarah ho javāb aadhā

maiñ apnī ulfat kā haal likkhūñ bayān-e-husn-e-sanam ko paḌh kar

ishāra ye hai jo saada rakkhā varaq miyān-e-kitāb aadhā

chhupā liiñ hāthoñ se us ne āñkheñ ulaT jo dī hai naqāb ruḳh se

ruke na dast-e-havas kī shoḳhī rahe ye jab tak hijāb aadhā

tumhārī uThtī huī javānī jo dekh paa.ī shanāvarī meñ

vafūr-e-hairat se rah gayā hai ubhar ke har ik habāb aadhā

'hayāt' ġhaflat nahīñ munāsib butoñ kī taa.at ko chhoḌ do ab

zarā to chauñko chalī javānī guzar gayā hai shabāb aadhā

sharab pi kar diya hai tum ne jo hum ko jam-e-sharab aadha

azal se likkha hua tha shayad ki paen hum tum sawab aadha

gale laga kar liya tha bosa hue the raazi visal par bhi

taDap ne dil ko jaga diya kyon abhi to dekha tha KHwab aadha

falak se kah do sahar qarin hai gai wo zulmat hui shab aaKHir

shafaq hina le ke aap aae ki uD gaya hai KHizab aadha

yahan hai zoron pe na-tawani wahan nazakat se baat mushkil

na kis tarah ho sawal aadha na kis tarah ho jawab aadha

main apni ulfat ka haal likkhun bayan-e-husn-e-sanam ko paDh kar

ishaara ye hai jo sada rakkha waraq miyan-e-kitab aadha

chhupa lin hathon se us ne aankhen ulaT jo di hai naqab ruKH se

ruke na dast-e-hawas ki shoKHi rahe ye jab tak hijab aadha

tumhaari uThti hui jawani jo dekh pai shanawari mein

wafur-e-hairat se rah gaya hai ubhar ke har ek habab aadha

'hayat' ghaflat nahin munasib buton ki taat ko chhoD do ab

zara to chaunko chali jawani guzar gaya hai shabab aadha