شرابوں پر گزارا ہے

شرابوں پر گزارا ہے

خسارا ہی خسارا ہے

نہیں نیت سنبھلنے کی

وگرنہ ہر سہارا ہے

گماں ہونے کے سو منظر

یقیں کو اک نظارا ہے

لو آنکھیں موند لیں ہم نے

مگر جو آشکارا ہے

تخیل کی رعایت میں

تو اب تک بھی ہمارا ہے

طبیعت بے نیازی کی

تکلف ہر گوارہ ہے

بڑے نازاں ہیں دکھ سہ کر

بڑا ہی تیر مارا ہے

ہمیں کس بات کی دقت

جو پیارا ہے وہ پیارا ہے

چلو پھر زندگی جی لیں

اگرچہ کچھ نہ چارہ ہے

امرؔ صاحب ہوئے فارغ

سبھی کچھ جیت ہارا ہے