شرارت بانکپن شوخی حیا کی

شرارت بانکپن شوخی حیا کی

کروں توصیف میں کس کس ادا کی

کیا خود فاش تم نے راز الفت

بھری محفل میں جب مجھ سے حیا کی

تصور میں بھی بے پردہ نہ آئے

بھلا کچھ انتہا ہے اس حیا کی

جفا کو بھی کیا بدنام تم نے

خلوص دل سے کب کوئی جفا کی

دیا ہے درد الفت مجھ کو تم نے

زہے قسمت جو یہ نعمت عطا کی

دیا تھا دل تمہیں اپنا سمجھ کر

خطا مجھ سے ہوئی میں نے خطا کی

رفیقؔ اپنا نہیں کوئی جہاں میں

کہا اپنا جسے اس نے دغا کی