shararat bankpan shoKHi haya ki

sharārat bāñkpan shoḳhī hayā kī

karūñ tausīf maiñ kis kis adā kī

kiyā ḳhud faash tum ne rāz-e-ulfat

bharī mahfil meñ jab mujh se hayā kī

tasavvur meñ bhī be-parda na aa.e

bhalā kuchh intihā hai is hayā kī

jafā ko bhī kiyā badnām tum ne

ḳhulūs-e-dil se kab koī jafā kī

diyā hai dard-e-ulfat mujh ko tum ne

zahe qismat jo ye ne'mat 'atā kī

diyā thā dil tumheñ apnā samajh kar

ḳhatā mujh se huī maiñ ne ḳhatā kī

'rafīq' apnā nahīñ koī jahāñ meñ

kahā apnā jise us ne daġhā kī

shararat bankpan shoKHi haya ki

karun tausif main kis kis ada ki

kiya KHud fash tum ne raaz-e-ulfat

bhari mahfil mein jab mujh se haya ki

tasawwur mein bhi be-parda na aae

bhala kuchh intiha hai is haya ki

jafa ko bhi kiya badnam tum ne

KHulus-e-dil se kab koi jafa ki

diya hai dard-e-ulfat mujh ko tum ne

zahe qismat jo ye ne'mat 'ata ki

diya tha dil tumhein apna samajh kar

KHata mujh se hui main ne KHata ki

'rafiq' apna nahin koi jahan mein

kaha apna jise us ne dagha ki