shararat hai manane ki ya manwane ka jhagDa hai

sharārat hai manāne kī yā manvāne kā jhagḌā hai

haiñ donoñ sūrateñ qātil qayāmat jaisā jhagḌā hai

tasavvur meñ tirā chehra zehn meñ baat hai terī

ye duurī kaisī duurī hai ye jhagḌā kaisā jhagḌā hai

manānā bhī nahīñ āsāñ samajh jaanā bhī hai mushkil

zarā sā vaqt do mujh ko ye ḳhud se pahlā jhagḌā hai

kahīñ par phuul khilte haiñ kahīñ par sher hote haiñ

magar jo sab se a.alā hai vo terā merā jhagḌā hai

ahd kī baat mat chheḌo vafā kā zikr rahne do

usī se bad-gumānī hai usī kā saarā jhagḌā hai

vazīfa paḌh liyā maiñ ne ki vo ḳhāmoshiyāñ TūTeñ

ḳhudā to phir ḳhudā hai aur ḳhudā se kaisā jhagḌā hai

na thā ilzām us ke sar na thī merī ḳhatā koī

ye uktāhaT kī duurī hai ye be-vaj.h kā jhagḌā hai

shararat hai manane ki ya manwane ka jhagDa hai

hain donon suraten qatil qayamat jaisa jhagDa hai

tasawwur mein tera chehra zehn mein baat hai teri

ye duri kaisi duri hai ye jhagDa kaisa jhagDa hai

manana bhi nahin aasan samajh jaana bhi hai mushkil

zara sa waqt do mujh ko ye KHud se pahla jhagDa hai

kahin par phul khilte hain kahin par sher hote hain

magar jo sab se aala hai wo tera mera jhagDa hai

ahd ki baat mat chheDo wafa ka zikr rahne do

usi se bad-gumani hai usi ka sara jhagDa hai

wazifa paDh liya main ne ki wo KHamoshiyan TuTen

KHuda to phir KHuda hai aur KHuda se kaisa jhagDa hai

na tha ilzam us ke sar na thi meri KHata koi

ye uktahaT ki duri hai ye be-wajh ka jhagDa hai