sharbat-e-wasl pila ja lab-e-shirin ki qasam

sharbat-e-vasl pilā jā lab-e-shīrīñ kī qasam

jaan jaatā hai mirā sūra-e-yāsīñ kī qasam

dekh mujh haal kuuñ ai taaza bahār-e-ḳhūbī

ashk-e-rañgīñ haiñ ravāñ dāman-e-gulchīñ kī qasam

maktab-e-ishq meñ aa aql kī taḳhtī dhonāñ

raast hai ye suḳhan ustād kī talqīñ kī qasam

shīsha-e-ḳhātir-e-nāzuk kuuñ mire mat kar chuur

ai sitamgar tujhe apne dil-e-sañgīñ kī qasam

ashk hai tel shab-e-hijr meñ ai jān-e-'sirāj'

har palak hasrat-e-zaitūn hai vattīñ kī qasam

sharbat-e-wasl pila ja lab-e-shirin ki qasam

jaan jata hai mera sura-e-yasin ki qasam

dekh mujh haal kun ai taza bahaar-e-KHubi

ashk-e-rangin hain rawan daman-e-gulchin ki qasam

maktab-e-ishq mein aa aql ki taKHti dhonan

rast hai ye suKHan ustad ki talqin ki qasam

shisha-e-KHatir-e-nazuk kun mere mat kar chur

ai sitamgar tujhe apne dil-e-sangin ki qasam

ashk hai tel shab-e-hijr mein ai jaan-e-'siraj'

har palak hasrat-e-zaitun hai wattin ki qasam