شربت میں دے شراب بھی ڈٹ کر گلاس میں

شربت میں دے شراب بھی ڈٹ کر گلاس میں

ورنہ رہے گی پیاس سمٹ کر گلاس میں

تنہا فقط نشہ نہیں آئینے کی طرح

تھوڑا بہت ہو عکس بھی کٹ کر گلاس میں

ہر گھونٹ لے گیا مجھے ماضی کے روبرو

کچھ ایسے ذہن رہ گیا بٹ کر گلاس میں

جس کی شعاعیں شیشے سے باہر دکھائی دیں

کچھ ایسے رنگ آئے پلٹ کر گلاس میں

پینے سے دل دماغ پہ چھایا خمار سا

ورنہ کہاں کھلی تھی الٹ کر گلاس میں

روکے ہوئے تھا کون نہ جانے مرا جنوں

کس کے نہ جانے لب تھے لپٹ کر گلاس میں

اتنی ہی اور اپنی طلب کو بڑھا گئی

پرویزؔ جتنی رہ گئی گھٹ کر گلاس میں