sharh-e-dard-e-ashiqi karte hain hum

sharh-e-dard-e-āshiqī karte haiñ ham

zaḳhm kī saudā-garī karte haiñ ham

dostoñ tum se koī shikva nahīñ

dosto tum ko barī karte haiñ ham

zindagī terī suhūlat ke liye

kuchh irādoñ meñ kamī karte haiñ ham

bujh rahī haiñ ghar kī dīvāreñ magar

maqbaroñ par raushnī karte haiñ ham

ek rasmī nek-chalnī ke liye

kin gunāhoñ kī nafī karte haiñ ham

ham ko sab rusvā.iyāñ manzūr haiñ

ihtirām-e-ādmī karte haiñ ham

sharh-e-dard-e-ashiqi karte hain hum

zaKHm ki sauda-gari karte hain hum

doston tum se koi shikwa nahin

dosto tum ko bari karte hain hum

zindagi teri suhulat ke liye

kuchh iradon mein kami karte hain hum

bujh rahi hain ghar ki diwaren magar

maqbaron par raushni karte hain hum

ek rasmi nek-chalni ke liye

kin gunahon ki nafi karte hain hum

hum ko sab ruswaiyan manzur hain

ihtiram-e-admi karte hain hum