شرح غم فراق کرے دل فگار کیا

شرح غم فراق کرے دل فگار کیا

دے گی نہ ساتھ اے نگہ لطف یار کیا

مجنوں کے مثل بن کے ہزاروں ستم سہے

فریاد تیرے آگے کرے دل فگار کیا

آتا ہے جی میں میرے کہ چھوڑیں دیار یار

تو ہی بتا دے کرنا پڑے گا فرار کیا

جس دن سے بے وفا نے اجاڑا ہے باغ دل

یکساں مرے لیے ہے خزاں کیا بہار کیا

کوتاہیٔ حیات کے شاکی ہیں خضر بھی

جب موت ہے تو زندگئ مستعار کیا

ساقی بتا دے مجھ کو پلانے سے پیشتر

کیا موت ہی بنے گی نشہ کا اتار کیا

کہتا ہے عشق ہو کے بغل گیر مجھ سے یوں

جب آ چکی ہے موت تو پھر انتظار کیا

احقرؔ کو لایا بزم میں اصرار اہل ذوق

تھا شاعروں میں ورنہ ہمارا شمار کیا