sharh-e-gham-e-firaq kare dil-figar kya

sharh-e-ġham-e-firāq kare dil-figār kyā

degī na saath ai nigah-e-lutf-e-yār kyā

majnūñ ke misl ban ke hazāroñ sitam sahe

fariyād tere aage kare dil-figār kyā

aatā hai jī meñ mere ki chhoḌeñ dayār-e-yār

tū hī batā de karnā paḌegā farār kyā

jis din se bevafā ne ujāḌā hai bāġh-e-dil

yaksāñ mire liye hai ḳhizāñ kyā bahār kyā

kotāhī-e-hayāt ke shākī haiñ ḳhizr bhī

jab maut hai to zindagī-e-musta'ār kyā

saaqī batā de mujh ko pilāne se peshtar

kyā maut hī banegī nashe kā utaar kyā

kahtā hai 'ishq ho ke baġhal-gīr mujh se yuuñ

jab aa chukī hai maut to phir intizār kyā

'ahqar' ko laayā bazm meñ isrār-e-ahl-e-zauq

thā shā'iroñ meñ varna hamārā shumār kyā

sharh-e-gham-e-firaq kare dil-figar kya

degi na sath ai nigah-e-lutf-e-yar kya

majnun ke misl ban ke hazaron sitam sahe

fariyaad tere aage kare dil-figar kya

aata hai ji mein mere ki chhoDen dayar-e-yar

tu hi bata de karna paDega farar kya

jis din se bewafa ne ujaDa hai bagh-e-dil

yaksan mere liye hai KHizan kya bahaar kya

kotahi-e-hayat ke shaki hain KHizr bhi

jab maut hai to zindagi-e-musta'ar kya

saqi bata de mujh ko pilane se peshtar

kya maut hi banegi nashe ka utar kya

kahta hai 'ishq ho ke baghal-gir mujh se yun

jab aa chuki hai maut to phir intizar kya

'ahqar' ko laya bazm mein israr-e-ahl-e-zauq

tha sha'iron mein warna hamara shumar kya