sharik-e-dard duniya mein baDi mushkil se milta hai

sharīk-e-dard duniyā meñ baḌī mushkil se miltā hai

duā.eñ jo davā se dil kā maarā dil se miltā hai

fareb-e-āsmāñ ġhurbat kī rāteñ dekhte jaao

ki har taara charāġh-e-sarhad-e-manzil se miltā hai

na jaane ruuh kis nākām kī maujoñ meñ bekal se

safīna Dagmagā jaatā hai jab sāhil se miltā hai

tumheñ to qadr karnī chāhiye thī apne āshiq kī

girāte ho nazar se tum use jo dil se miltā hai

'hayāt' un kā zamāna hai vo jo chāheñ sitam Dhā.eñ

magar āshiq bhī mujh jaisā baḌī mushkil se miltā hai

sharik-e-dard duniya mein baDi mushkil se milta hai

duaen jo dawa se dil ka mara dil se milta hai

fareb-e-asman ghurbat ki raaten dekhte jao

ki har tara charagh-e-sarhad-e-manzil se milta hai

na jaane ruh kis nakaam ki maujon mein bekal se

safina Dagmaga jata hai jab sahil se milta hai

tumhein to qadr karni chahiye thi apne aashiq ki

giraate ho nazar se tum use jo dil se milta hai

'hayat' un ka zamana hai wo jo chahen sitam Dhaen

magar aashiq bhi mujh jaisa baDi mushkil se milta hai